Në draftbuxhetin e vitit 2026 është përfshirë për herë të parë projekti i rrugës lidhëse Tiranë–Elbasan me Korridorin VIII, një segment strategjik që synon të lehtësojë trafikun në hyrje të autostradës Tiranë–Elbasan dhe në rrethrrotullimin e Bradasheshit.
Projekti është parashikuar si pjesë e paketës së investimeve publike për infrastrukturën rrugore, me financim që do të nisë në vitin 2027, sipas planifikimeve të Ministrisë së Infrastrukturës dhe Energjisë. Segmenti në fjalë është kthyer në makth të përditshëm për ata që duan të udhëtojnë nga Tirana në drejtim të Elbasanit apo Korçës.
Ky aks do të lidhet drejtpërdrejt me Korridorin VIII, një nga projektet më të rëndësishme të transportit rajonal që përfshin Shqipërinë, Maqedoninë e Veriut dhe Bullgarinë.
Sipas të dhënave të buxhetit, për ndërtimin dhe sistemimin e rrugëve janë planifikuar 20.22 miliardë lekë në total, nga 18.53 miliardë lekë që ishin sivjet. Korridori VIII mbetet projekti me financimin më të madh, me 8.4 miliardë lekë të akorduara për 13 lotet aktualisht në ndërtim.
Krahas tij, buxheti për vitin e ardhshëm parashikon fonde edhe për bypass-in e Tiranës, zgjerimin e autostradës Tiranë–Durrës, rikonstruksionin e rrugës Kombinat–Ndroq–Plepa, si dhe bypass-in e Sarandës.
Projekti i rrugës lidhëse me Korridorin VIII shihet si një zgjidhje afatgjatë për trafikun e ngarkuar në hyrje të Elbasanit, duke krijuar një korridor të drejtpërdrejtë që do të lidhë kryeqytetin me rrjetin rajonal të transportit dhe portet lindore të Adriatikut. /skyweb.al
