Po të prishet një motor i avionit gjatë fluturimit, shumica e pasagjerëve do të tronditeshin, por e vërteta është se kjo nuk përbën domosdoshmërisht një situatë emergjente apo të rrezikshme.
Avionët modernë të pasagjerëve janë të projektuar për të fluturuar në mënyrë të sigurt edhe vetëm me një motor. Kjo nuk është vetëm një mundësi teorike, është një standard i domosdoshëm që kompanitë prodhuese dhe linjat ajrore duhet të plotësojnë për të marrë certifikimet ndërkombëtare të sigurisë.
Nëse një nga motorët ndalon për shkak të një defekti teknik, konsumimi të tepërt të karburantit ose një goditjeje me trup të huaj, siç janë shpesh rastet me shpendë, piloti ka një sërë protokollesh të qarta që ndjek.
Fillimisht, ai konfirmon situatën përmes sistemeve të kontrollit dhe ndërhyn sipas nevojës për të izoluar problemin.
Më pas, njofton kontrollin e trafikut ajror dhe planifikon devijimin e fluturimit drejt aeroportit më të afërt ku mund të ulet në mënyrë të sigurt. Kjo procedurë zhvillohet në mënyrë të qetë dhe të koordinuar, duke i dhënë përparësi jetës dhe sigurisë së pasagjerëve.
Një nga arsyet pse një avion me dy motorë lejohet të fluturojë edhe në rrugë të gjata ndërkombëtare është certifikata ETOPS, një standard ndërkombëtar që përcakton se sa kohë një avion mund të vazhdojë të fluturojë me vetëm një motor aktiv, derisa të ulet në një aeroport alternativ.
Për shembull, një certifikim ETOPS-180 i lejon avionit të fluturojë deri në tre orë larg vendit më të afërt të uljes.
Në praktikë, këto raste ndodhin rrallë, por kur ndodhin, zakonisht përfundojnë pa incidente. Pilotët stërviten rregullisht për situata të tilla në simulatorë, dhe vendimmarrja e tyre bazohet në qetësi, përvojë dhe bashkëpunim me ekipin në tokë.
Shumë nga këto fluturime përfundojnë me ulje të zakonshme në një aeroport tjetër dhe pasagjerët shpeshherë nuk e kuptojnë që diçka e pazakontë ka ndodhur.
Shembuj të njohur si ulja mbi lumin Hudson nga kapiteni Sully Sullenberger kanë krijuar perceptimin e rrezikut të madh në publik, por janë përjashtime që konfirmojnë rregullin: avionët janë të sigurt edhe në kushtet më të vështira, dhe protokollet funksionojnë.
Në thelb, ndalja e një motori nuk përbën rrezik katastrofik, ajo është një nga situatat për të cilat teknologjia dhe pilotët janë më së miri të përgatitur.
Kështu që, ne urojmë të mos ju ndodhë kurrë, por nëse ndodh, ruani qetësine dhe besojini pilotëve dhe teknologjisë! /skyweb.al
