Për herë të parë në rajonin Lazio të Italisë, dy gra kanë marrë njohje zyrtare ligjore për lidhjen mes vaksinës kundër Covid-19 dhe problemeve serioze shëndetësore.
Sipas Wanted in Rome, bëhet fjalë për dy gra nga provinca Latina, të cilat kanë arritur të provojnë përmes ekspertizës mjeko-ligjore se kanë pësuar dëmtime kardiake dhe neurologjike pas marrjes së vaksinës.
Vendimi i autoriteteve italiane nuk kufizohet vetëm në njohjen e përkeqësimit të gjendjes shëndetësore, por shkon më tej, duke hapur rrugën për përfitime financiare. Një prej grave tashmë ka nisur të marrë një kompensim mujor nga shteti, i cili sipas raportimit arrin rreth 850 euro.
Rasti konsiderohet i rëndësishëm, pasi mund të krijojë precedent për kërkesa të tjera të ngjashme në Itali, në një kohë kur mekanizmat ligjorë për kompensimin e efekteve të rralla nga vaksinat janë pjesë e legjislacionit në disa vende europiane.
Megjithatë, rasti mbetet individual dhe lidhet me situata specifike të vlerësuara nga ekspertët, pa ndryshuar qëndrimin e përgjithshëm të autoriteteve shëndetësore mbi sigurinë e vaksinave. /skyweb.al
