Një ngjarje e rëndë është regjistruar në Tiranë, ku një fëmijë 3-vjeçar është kafshuar nga një qen.
Sipas njoftimit të Policisë, pronari i kafshës, shtetasi Xh. S., 35 vjeç, është vënë nën hetim nga Specialistët për Hetimin e Krimeve të Komisariatit të Policisë Nr. 1, ndërsa ndaj tij ka nisur procedimi penal në gjendje të lirë.
Ngjarja ka ndodhur në oborrin e banesës së 35-vjeçarit.
Aktualisht, i mituri ndodhet nën kujdesin e mjekëve dhe gjendja e tij shëndetësore ende nuk dihet.
Ky rast rikthen edhe një herë në vëmendje problematikën e qarkullimit të qenve të racave agresive nëpër qytet, shpesh të lëshuar nga pronarët pa asnjë masë sigurie.
Pavarësisht detyrimeve ligjore për vendosjen e maskave mbrojtëse dhe kontrollit të rreptë të këtyre kafshëve, në shumë raste vihet re se qentë e racave të rrezikshme shëtisin të lirë, pa mbrojtëse dhe pa kujdesin e pronarëve, duke rrezikuar sigurinë e qytetarëve, veçanërisht fëmijëve.
Autoritetet pritet të vijojnë hetimet për të zbardhur të plotë rrethanat e ngjarjes, ndërsa apelohet për respektimin rigoroz të rregullave të mbajtjes së qenve në ambiente publike dhe private./skyweb.al
