Në Shtetet e Bashkuara, zotërimi i një banese ka qenë tradicionalisht mënyra kryesore për ndërtimin e pasurisë familjare.
Por rritja e çmimeve të pasurive të paluajtshme ka bërë që shumë të rinj të mos kenë më mundësi të hyjnë në tregun e banesave, ose të besojnë se mund të fitojnë më shumë duke investuar paratë diku tjetër.
Në rrjetet sociale, një numër i madh influencerësh po nxisin një qasje të re: “Mos e sforco veten për të blerë një shtëpi me çmime kaq të larta, jeto me qira dhe investo kursimet.”
Debati mes qirasë dhe pronësisë është i vjetër, por sot po merr një dimension të ri për shkak të rritjes së bursave.
Gjatë viteve të fundit, tregjet e aksioneve kanë dhënë mesatarisht rreth 14% fitim vjetor, shumë më lart se mesatarja historike, duke i bërë të rinjtë të mendojnë ndryshe për mënyrën si ndërtohet pasuria.
Megjithatë, tregu i aksioneve nuk është më i lirë: indeksi S&P 500 sot është pothuajse po aq i mbivlerësuar sa në prag të krizës së viteve 2000.
Në të njëjtën kohë, hendeku mes kostos së zotërimit të një shtëpie dhe qirasë është zgjeruar ndjeshëm, duke forcuar argumentin se jetesa me qira mund të jetë më e leverdishme. Ky ndryshim po ndodh ndërkohë që brezi i ri është tërhequr nga investimet përmes aplikacioneve si Robinhood Markets, rritjes së interesit për kriptovaluta dhe “meme stocks” që qarkullojnë në platformat online.
Një raport i JPMorgan Chase tregon se 37% e 25-vjeçarëve amerikanë përdorën llogari investimi në vitin 2024, nga vetëm 6% në vitin 2015, një rritje gjashtëfish që dëshmon për ndryshimin e mënyrës se si të rinjtë po ndërtojnë pasurinë e tyre: më pak me kredi hipotekare dhe më shumë me investime. /skyweb.al
