Bizneset në Shqipëri do të klasifikohen me kufij më të lartë financiarë duke nisur nga viti 2028, pas ndryshimeve në ligjin “Për kontabilitetin dhe pasqyrat financiare”, të publikuara tashmë në Fletoren Zyrtare.
Ndryshimet prekin mikronjësitë, bizneset e vogla dhe ndërmarrjet e mesme, duke rritur nivelin e aktiveve dhe të ardhurave që një kompani mund të ketë pa kaluar automatikisht në një kategori më të lartë.
Ligji hyn në fuqi 15 ditë pas botimit, ndërsa aneksi i tij përcakton kufijtë e rinj që do të aplikohen për vitin 2028.
Për mikronjësitë, kufiri i të ardhurave rritet nga 70 milionë në 90 milionë lekë, ndërsa ai i aktiveve nga 35 milionë në 45 milionë lekë.
Për bizneset e vogla, pragu i të ardhurave kalon nga 700 milionë lekë në 1 miliard lekë, ndërsa aktivet mund të arrijnë deri në 500 milionë lekë.
Edhe ndërmarrjet e mesme do të kenë më shumë hapësirë përpara se të klasifikohen si biznese të mëdha. Kufiri i të ardhurave rritet nga 4 në 5 miliardë lekë, ndërsa ai i aktiveve nga 2 në 2.5 miliardë lekë. Numri maksimal i punonjësve për secilën kategori mbetet i pandryshuar.
Në praktikë, ndryshimi do të bëjë që një pjesë e kompanive që rritin xhiron apo aktivet të vazhdojnë të konsiderohen mikro, të vogla ose të mesme edhe në nivele më të larta financiare, pa kaluar menjëherë në kategorinë pasuese. /skyweb.al
