Enti Rregullator i Energjisë ka nisur procedurat për licencimin e shoqërisë “Fier Thermoelectric” për prodhimin e energjisë elektrike nga termocentrali me gaz në Roskovec, me kapacitet të instaluar 170 megavat.
Vendimi u mor në mbledhjen e fundit të Bordit të ERE-s, ndërsa palët e interesuara kanë afat deri më 8 korrik 2025 për të paraqitur me shkrim komentet apo kundërshtimet pranë zyrave të institucionit apo përmes postës elektronike.
Termocentrali i parashikuar do të përdorë gaz natyror dhe pritet të ketë një afat operimi prej 49 vitesh.
Projekti mori miratimin e qeverisë në dhjetor 2024 dhe parashikohet të hyjë në funksion pas tre vitesh, duke përfshirë periudhën për marrjen e lejes së ndërtimit dhe realizimin e punimeve.
Shoqëria “Fier Thermoelectric” ka si aksionarë kryesorë kompaninë greke GEK TERNA me 70% të kuotave, ndërsa pjesa tjetër prej 30% zotërohet nga kompania shqiptare “Gener 2”.
Sipas Raportit të Vlerësimit të Ndikimit në Mjedis, impianti do të funksionojë me cikël të kombinuar, me furnizim të siguruar me gaz përmes një marrëveshjeje të nënshkruar në shkurt 2022 mes GEK TERNA dhe Korporatës Publike të Gazit të Greqisë (DEPA). Marrëveshja parashikon furnizimin me rreth 2 teravat orë gaz në vit për të paktën 7 vjet, përmes pikës së ndërlidhjes ABV31 në Gazsjellësin Trans Adriatik (TAP).
Megjithatë, ndërtimi i termocentralit është kundërshtuar nga banorët e zonës, të cilët kanë protestuar publikisht ndaj projektit. Ata shprehin shqetësime për ndikimin që impianti mund të ketë mbi tokat bujqësore dhe mjedisin përreth, duke kërkuar që projekti të anulohet ose të zhvendoset.
