Inteligjenca Artificiale pritet të sjellë një rritje prej 37% në vlerën e tregtisë dhe shërbimeve globale deri në vitin 2040, sipas Raportit Botëror të Tregtisë 2025. Sipas raportit, teknologjitë e avancuara të AI po ndikojnë ndjeshëm në përmirësimin e produktivitetit dhe lehtësimin e përmbushjes së standardeve dhe rregulloreve tregtare.
Përfitimet më të mëdha nga përdorimi i AI parashikohen të ndodhin në sektorin e shërbimeve digjitale, ndërsa mallrat që mundësojnë këtë teknologji, si gjysmëpërçuesit, kanë arritur një vlerë tregu prej 2,3 trilionë dollarësh vetëm në vitin 2023.
Megjithatë, raporti thekson se këto zhvillime teknologjike nuk shpërndahen në mënyrë të barabartë. Drejtoresha e përgjithshme e OBT-së, Ngozi Okonjo-Iweala, paralajmëron se pa investime të qëndrueshme në arsim, infrastrukturë digjitale dhe politika të përbashkëta ndërkombëtare, shumë vende të varfra rrezikojnë të mbeten pas.
Sipas saj, fuqia punëtore e kualifikuar dhe infrastruktura teknologjike janë aktualisht të përqendruara në një numër të vogël vendesh me të ardhura të larta, duke krijuar një boshllëk të madh në qasjen ndaj teknologjisë. “AI ka potencial për të ulur ndjeshëm kostot e tregtisë dhe për të rritur eksportet e shërbimeve,” deklaron Okonjo-Iweala, “por përfitimet nuk janë të shpërndara në mënyrë të drejtë.”
Raporti nënvizon nevojën për bashkëpunim ndërkombëtar dhe përfshirje aktive të vendeve me të ardhura të ulëta në tregtinë digjitale globale. Pa veprime të qëndrueshme dhe politika gjithëpërfshirëse, rritja e parashikuar mund të mbetet vetëm në letër.
Për këtë arsye, OBT i bën thirrje qeverive anembanë botës të shtojnë investimet në arsim, teknologji dhe ndërtimin e kapaciteteve digjitale, në mënyrë që përfitimet e Inteligjencës Artificiale të jenë të aksesueshme për të gjitha vendet.
