Ministria e Infrastrukturës dhe Energjisë ka hedhur për konsultim publik Strategjinë e re për Sigurinë Rrugore dhe Planin e Veprimit për periudhën 2026–2030. Drafti in ri ka për qëllim përmbushjen e objektivave të vendosura nga Bashkimi Europian dhe Kombet e Bashkuara në fushën e sigurisë rrugore, duke vendosur në fokus mbrojtjen e jetës në rrugë përmes masave më të qarta, gjithëpërfshirëse dhe të qëndrueshme.
Edhe pse janë bërë përmirësime të dukshme në infrastrukturën rrugore dhe në zbatimin e rregullave të qarkullimit, rritja e numrit të automjeteve dhe aksidenteve rrugore vazhdon të jetë një sfidë serioze. Sipas draftit ky është një tregues për të forcuar më tej kuadrin ligjor, masat parandaluese dhe ndërhyrjet në sjelljen e përdoruesve të rrugës.
Sipas të dhënave zyrtare, grupet më të ekspozuara ndaj rrezikut në trafik janë këmbësorët, çiklistët dhe motoçiklistët, që shpesh përballen me pasoja të rënda në raste aksidentesh. Një zhvillim i ri është edhe shtimi i përdoruesve të skuterëve elektrikë, të cilët po bëhen gjithnjë e më të pranishëm në qytetet shqiptare, por gjithashtu përfaqësojnë një burim të ri risku, si për drejtuesit ashtu edhe për këmbësorët.
Aktualisht, kuadri ligjor që rregullon përdorimin e skuterëve elektrikë është i papërshtatshëm, pasi i trajton ata si biçikleta, megjithëse rreziku që paraqesin është shpesh i ngjashëm me atë të motoçikletave. Sjellje të rrezikshme si kalimi i semaforit me të kuqe, drejtimi në sens të kundërt, përdorimi i trotuareve, mungesa e sinjalistikës ndriçuese dhe shkelja e rregullave të tjera, janë ndër faktorët që po kontribuojnë në rritjen e aksidenteve.
Për herë të parë, Strategjia parashikon rregulla për mjetet të transportit personal si patinat elektrike, duke vendosur kërkesa të reja për pajisje sigurie, rregulla për lëvizjen në rrugë dhe ndalime të qarta për zonat e banuara. Për zbatimin e këtyre masave është parashikuar një fond prej 4.5 milionë lekësh.
Strategjia e re bazohet në konceptin “Sistemi i Sigurt” dhe synon reduktimin e fataliteteve në rrugë me 50% deri në vitin 2030, në krahasim me vitin 2021. Megjithatë, duke marrë parasysh kohën e hyrjes në fuqi të Planit të Veprimit në vitin 2026, objektivi afatmesëm është reduktimi me 30% i humbjeve të jetës deri në fund të dekadës.
Strategjia parashikon edhe rishikimin e kufijve të shpejtësisë në rrugët kryesore dhe lokale, në përputhje me standardet moderne të sigurisë. Kjo masë do të mbështetet financiarisht me një buxhet prej 26 milionë lekësh.
Gjithashtu, do të vendosen kamera për matjen e shpejtësisë dhe sinjalistikë inteligjente në 12 zona të identifikuara si të rrezikshme, të integruara me sistemin QKMT, me një kosto prej 20 milionë lekësh. Këto pajisje do të ndihmojnë në frenimin e tejkalimit të shpejtësisë dhe disiplinimin e qarkullimit rrugor. /Skyweb.al
