Zëvendëskryeministrja dhe Ministrja e Infrastrukturës dhe Energjisë, Belinda Balluku, mori pjesë në Konferencën e 5-të Ndërkombëtare për Marinat e Qëndrueshme dhe Inteligjente, e zhvilluar në Principatën e Monakos.
Gjatë fjalës së saj, Balluku theksoi se Shqipëria ka nisur punën për hartimin e një strategjie kombëtare për zhvillimin e marinave përgjatë gjithë vijës bregdetare, nga veriu në jug me synimin për të kthyer vendin në një qendër rajonale të rëndësishme në Mesdhe, krahas vendeve si Kroacia, Mali i Zi dhe Greqia.
“Industria jonë detare po njeh një zhvillim të qëndrueshëm, falë projekteve të rëndësishme si portet e Porto Romanos dhe Triportit. Së shpejti, edhe Marina e Durrësit dhe ajo e Vlorës do të nisin operacionet, duke e pozicionuar Shqipërinë si një destinacion të ri në hartën e turizmit detar mesdhetar,” u shpreh ministrja.
Balluku theksoi se zhvillimi i kësaj industrie jo vetëm që do të nxisë më tej rritjen e turizmit, tashmë një prej sektorëve më të rëndësishëm të ekonomisë shqiptare, por do të krijojë edhe mundësi të reja punësimi, veçanërisht për të rinjtë.
“Ky sektor i ri kërkon profesionistë të rinj, të trajnuar dhe të aftë për të përqafuar teknologjitë moderne dhe për të sjellë inovacion në industrinë detare shqiptare,” deklaroi ajo, duke nënvizuar rëndësinë e arsimit profesional dhe formimit në përputhje me nevojat e tregut. /Skyweb.al
