Në një kohë kur turizmi po jep një kontribut të madh për zhvillimin ekonomik dhe social të vendit, a po shtohen më shumë biznese në këtë sektor dhe sa po investojnë ato që janë aktualisht në përmirësimin e cilësisë së shërbimit?
Sipas të dhënave nga Qendra Kombëtare e Biznesit, numri më i lartë i regjistrimeve të bizneseve të reja gjatë vitit të kaluar, ishte në kategorinë “Tregtia me shumicë dhe me pakicë; riparimi i automjeteve dhe motoçikletave” me 4,865 regjistrime apo 27.8%, ndjekur nga sektori i akomodimit dhe shërbimit ushqimor me 15.6%, ku një pjesë e bizneseve operojnë në fushën e turizmit.
Por sa prej këtyre bizneseve në turizëm morën hua për t’u çelur dhe sa prej biznesve ekzistuese morën hua për të kryer investime, me qëllim përmirësimin e cilësisë së shërbimit?
Statistikat e Shoqatës Shqiptare të Bankave (AAB) tregojnë se nga viti 2020 deri në 2024, bankat kanë mbështetur sektorin e turizmit me qindra hua të reja, me një vlerë totale mbi 9 miliardë lekë në vit.
Këto shifra përkthehen në më shumë njësi akomodimi dhe shërbimi si hotele, bujtina, resorte, restorante, marina, infrastrukturë, e të tjera, për një Shqipëri gjithmonë dhe me më standarde turistike, shprehet Shoqata.
Në një hark kohor prej 5 vitesh, 2021 do të regjistronte numrin dhe vlerën më të lartë të kredisë në turizëm, konkretisht 735 hua të marra të cilat kapnin një vlerë prej 9.95 miliardë lekësh. Në 2024 u morën vetëm 6 kredi më pak se në 2023, por shuma e tyre ishte rreth 10.7% më e lartë.
Pavarësisht se kredia në turizëm i është rikthyer një tendence rritëse, ajo vijon të mbetet në nivele të ulëta në krahasim me 2021. /tvscan
