Instituti i Sigurimeve Shoqërore i ka bërë një thirrje publike për qytetarëve shqiptarë që të përfitojnë nga mundësia e sigurimit vullnetar, në një kohë kur skema e pensioneve ndodhet nën presion të madh financiar dhe deficiti i thellë i saj mbulohet çdo vit nga buxheti i shtetit.
Sipas një postimi të ISSH në rrjetet sociale, të drejtën për të paguar sigurim vullnetar e kanë të gjithë shtetasit shqiptarë që kanë mbushur moshën 18 vjeç deri në arritjen e moshës së pensionit të pleqërisë.
Sigurimi vullnetar mbulon periudhën aktuale për personat që nuk janë pjesë e sigurimit të detyrueshëm.
Pagesat mund të kryhen mujore, tremujore apo vjetore, ndërsa për parapagimin e kontributeve ISSH aplikon edhe ulje: 6 për qind për pagesë vjetore, 3 për qind për pagesë gjashtëmujore dhe 1.5 për qind për pagesë tremujore.
Instituti sqaron gjithashtu se sigurimi vullnetar mund të përdoret për plotësimin e periudhave të kaluara të pambuluara me sigurim të detyrueshëm deri në plotësimin e moshës së pensionit, ndërsa personat e punësuar, të vetëpunësuar apo punëdhënësit privatë mund të paguajnë kontribute shtesë për të siguruar pensione më të larta pleqërie, invaliditeti apo familjare.
Këto pagesa shtesë mund të bëhen vetëm për vitin aktual dhe jo për periudha të mëparshme.
Kuota mujore e sigurimit vullnetar është 8,640 lekë, ndërsa kuota vjetore arrin në 103,680 lekë.
Sipas ISSH-së, sigurimi vullnetar nuk mund të kryhet pas lindjes së së drejtës për një përfitim nga skema e sigurimeve të detyrueshme dhe as nga të vetëpunësuarit në bujqësi, të cilët përfitojnë subvencione nga buxheti i shtetit.
Procedura realizohet nëpërmjet një marrëveshjeje të drejtpërdrejtë mes personit që aplikon dhe punonjësit të ngarkuar në strukturat e ISSH-së.
Thirrja për të paguar sigurime vullnetare vjen në një moment delikat për skemën e pensioneve, e cila për shkak të raportit gjithnjë e më të dobët mes kontribuuesve dhe përfituesve, po përballet me vështirësi serioze financiare./skyweb.al
