Tenderi me vlerë rreth 425 mijë euro për mirëmbajtjen e sistemeve të sigurisë në Portin e Durrësit ka përfunduar në gjykatën e prokurimeve publike pasi u shpall fitues kompania që ofroi më shumë.
Sipas dokumenteve të konsultuara nga Skyweb.al, Komisioni i Vlerësimit të Ofertave i ngritur nga Autoriteti Portual i Durrësit ka shpallur fituese kompaninë “LAVIVA TECHONOLOGIES”, e cila ofroi 407 000 euro ose 96% të fondit limit.
Në tender morën pjesë edhe kompani si “Advanced Business Solutions – ABS”, e cila u ofrua ta bënte punën për rreth 320 mijë euro si edhe “AES Communication” Shpk që u ofrua për rreth 380 000 euro, ndërsa pjesëmarrësi tjetër, NOAL nuk bëri asnjë ofertë pavarësisht shprehjes së interesit.
Siç konstaton Skyweb.al, më shumë se bazuar mbi koston e shërbimit dhe kursimin e parave të Portit, fituesi është shpallur nga KVO duke patur më shumë në konsideratë element si certifikata të caktuara nga ofertuesit duke çuar në shpalljen fitues të LAVIVA-s, e cila duket se ka patur të gjitha certifikatat e kërkuara edhe pse çmimi ishte rreth 90 mijë euro më i shtrenjtë se ai i ABS për shembull.
Skualifikimi “AES Communication” dhe “Advanced Business Solutions (ABS)”
Operatorët “AES Communication” dhe “Advanced Business Solutions (ABS)” u skualifikuan nga procedura e prokurimit për mungesë të certifikimeve teknike të vlefshme dhe të përshtatshme, sipas kërkesave të dosjes së tenderit.
Sipas KVO-së, AES nuk përmbushi kriteret pasi paraqiti certifikata jo të lëshuara nga prodhuesit zyrtarë, të pavlefshme ose jo ekuivalente, si në rastin e trajnimeve për serverat HPE, sistemet Bosch dhe rrjetet (ÇNA).
Ndërkohë, ABS nuk arriti të paraqesë certifikime të unifikuara dhe të barasvlershme me sistemet e kërkuara Bosch për kontroll aksesi, alarm, ruajtje video dhe integrim sistemesh sigurie, duke dorëzuar certifikata të pjesshme nga prodhues të ndryshëm, që nuk përmbushnin në mënyrë të plotë kërkesat teknike të specifikuara.
Nisur nga kjo, “Advanced Business Solutions (ABS)” e Gerond Meçes, një ndër përfituesit më të mëdhenj të fondeve publike në sektorin e teknologjisë së informacionit dhe sistemeve të sigurisë, është ankuar pranë Komisionit të Prokurimit Publik duke kundërshtuar vendimin e KVO-së së Autoritetit Portual të Durrësit, përfaqësuar nga Kreshnik Bajraktari.
Peridha e ankimimit sapo ka nisur dhe mbetet për t’u parë nëse edhe AES Communication do të ankimojë vendimin për të shpallur fitues kompaninë që ofrpoi që shumë. /skyweb.al
