Sipas të dhënave nga Instituti i Statistikave prodhimi i naftës bruto në vend është ulur, në 716 mijë tonë në 2024, nga 891 mijë tonë në vitin 2023. Për pasojë, edhe vlera e shitjeve të këtij produkti ra në 29,9 miliardë lekë, nga 39,2 miliardë lekë një vit më parë.
Një ulje e fortë u regjistrua gjithashtu edhe në prodhimin e hekurit bruto dhe çelikut, që zbriti në 343 mijë tonë nga 474 mijë tonë në 2023, me vlerën e shitjeve që arriti në 20,2 miliardë lekë. Prodhimi i kromit pësoi gjithashtu tkurrje, duke u ulur në 588 mijë tonë nga mbi 822 mijë tonë në vitin e kaluar, ndërsa vlera e shitjeve ra në 14,9 miliardë lekë, nga mbi 20 miliardë lekë në 2023.
Industria e materialeve të ndërtimit shfaqi rezultate më të qëndrueshme. Prodhimi i çimentos arriti rreth 1.94 milionë tonë, me një rënie të lehtë krahasuar me vitin 2023, ndërsa vlera e shitjeve mbeti thuajse e pandryshuar në 19,2 miliardë lekë. Në të njëjtën kohë, prodhimi i betonit të gatshëm arriti në 1,7 milionë tonë, me vlerë shitjesh mbi 13 miliardë lekë.
Në sektorin ushqimor dhe të pijeve u shënuan rritje pozitive. Prodhimi i ujit mineral dhe të gazuar u rrit në gati 5 milionë hektolitra në 2024, nga 3,8 milionë hektolitra në 2023, ndërsa vlera e shitjeve u rrit në 8,3 miliardë lekë, nga 6,3 miliardë lekë një vit më parë. Prodhimi i pijeve joalkoolike gjithashtu u rrit, duke kaluar 1,23 milionë hektolitra, me vlerë shitjesh 7,4 miliardë lekë.
Në segmentin ushqimor, prodhimi i salçiçeve dhe produkteve të ngjashme me mish shënoi një rritje të lehtë, duke arritur në 13 mijë tonë dhe duke sjellë një rritje të vogël të vlerës së shitjeve, që arriti në 9,2 miliardë lekë.
Edhe sektori i sistemeve të fijeve elektrike të izoluara për automjete regjistroi rritje, me prodhimin që u rrit nga 229 milionë në 241 milionë copë, ndërsa vlera e shitjeve arriti në 8,7 miliardë lekë, nga 8,2 miliardë lekë në 2023.
Sipas INSTAT, për vitin 2024, industria e përpunimit të ushqimeve përbënte 14% të vlerës së përgjithshme të shitjeve të produkteve industriale, duke u rritur nga 12,4% në 2023. Produktet minerale jo metalike zinin 13,2% të shitjeve, gjithashtu në rritje nga 12,5% një vit më parë, ndërsa sektori i metalurgjisë pësoi një rënie, duke zënë 12,4% të totalit, nga 13,4% në vitin 2023.
Të dhënat e INSTAT tregojnë për një vit të vështirë për industrinë e naftës, kromit dhe hekurit, por me rritje të dukshme në sektorin e ushqimeve dhe pijeve, si dhe stabilitet në industrinë e materialeve të ndërtimit. Kjo tregon një ndryshim gradual në strukturën industriale të vendit, ku peshën e sektorëve tradicionalë të nxjerrjes po e zëvendësojnë në masë të konsiderueshme sektorët e konsumit ushqimor dhe përpunues. /Skyweb.al
