Qeveria ka miratuar vendimet e para që vënë në zbatim të ashtuquajturën Paketë e Maleve, një nismë që synon nxitjen e zhvillimit ekonomik në zonat e thella dhe malore të vendit.
Sipas vendimeve të Këshillit të Ministrave, disa fshatra në Belsh, Elbasan, Përmet dhe Skrapar janë shpallur zona me përparësi zhvillimi të ekonomisë malore, duke u dhënë status të veçantë për tërheqjen e investimeve private.
Në këto zona do të lejohen aktivitete të lidhura me zhvillimin ekonomik, industrial dhe turizmin, duke u krijuar hapësira për projekte që mund të sjellin punësim dhe infrastrukturë lokale.
Qeveria ka bërë të ditur se tokat publike do të mund të jepen me çmimin simbolik prej 1 euro për investitorët që angazhohen të zhvillojnë aktivitete ekonomike në këto territore.
Përveç kësaj, bizneset që do të investojnë në zonat e shpallura përfitojnë përjashtim nga taksat për një periudhë katërvjeçare, si nxitje për të zhvilluar sektorë të qëndrueshëm në turizëm, bujqësi, përpunim apo energji të pastër.
Paketat e reja të zhvillimit pritet të përfshijnë edhe mbështetje infrastrukturore, përmirësim të rrjeteve rrugore dhe lehtësira për kredidhënie, duke synuar rigjallërimin ekonomik të zonave malore, ku popullsia është tkurrur ndjeshëm vitet e fundit.
Qeveria e cilëson këtë nismë si një model të ri të politikave territoriale, që kombinon investimin privat me përjashtime fiskale për të ringjallur potencialin ekonomik të maleve shqiptare./skyweb.al
