Ndryshimet klimatike po shkaktojnë gjithnjë e më shumë pasoja të rënda për shëndetin e njerëzve në mbarë botën. Një raport i ri i publikuar nga Organizata Botërore e Shëndetësisë (OBSH) tregon se planeti po ngrohet me ritme të frikshme, ndërsa përgjigjja globale ndaj këtij fenomeni vazhdon të jetë e pamjaftueshme.
Raporti i vitit 2025 mbi Shëndetin dhe Ndryshimet Klimatike, i përgatitur në bashkëpunim me OBSH-në, zbulon se 12 nga 20 treguesit kryesorë që matin kërcënimet shëndetësore kanë arritur nivele rekord. Sipas dokumentit, mosveprimi ndaj krizës klimatike po kushton jetë njerëzish, po rëndon sistemet shëndetësore dhe po dëmton ekonomitë në mbarë botën.
Vdekjet e lidhura me nxehtësinë janë rritur me 23% që nga vitet 1990, duke arritur në një mesatare prej rreth 546 mijë viktimash çdo vit. Vetëm gjatë vitit të kaluar, çdo person ka qenë i ekspozuar ndaj të paktën 16 deri në 20 ditë me temperatura të rrezikshme.
Sipas raportit, nxehtësia ekstreme ka shkaktuar humbjen e 640 miliardë orëve të mundshme pune në vitin 2024, duke sjellë një humbje produktiviteti që llogaritet në mbi 1.09 trilion dollarë amerikanë. Ndërkohë, kostot ekonomike të vdekjeve nga nxehtësia tek të moshuarit janë vlerësuar në rreth 261 miliardë dollarë.
OBSH paralajmëron se, nëse nuk merren masa urgjente, Evropa, përfshirë edhe Shqipërinë do të përballet me ditë gjithnjë e më të nxehta, me ndikim të drejtpërdrejtë në shëndetin e popullsisë dhe në ekonominë e vendeve.
Të dhënat tregojnë se pjesa më e madhe e kontinentit tashmë është “me të kuqe” në hartat klimatike, duke reflektuar rritje të vazhdueshme të temperaturave. Edhe Shqipëria po përjeton çdo vit temperatura më të larta, që janë rritur me të paktën 2-3 gradë Celsius, duke shkaktuar gjithashtu rritje të zjarreve në pyje.
Përveç ditëve përvëluese, vendet evropiane po përballen edhe me net më të nxehta se më parë, të cilat ndikojnë negativisht në cilësinë e gjumit dhe në mirëqenien e përgjithshme të njerëzve. /Skyweb.al
