Rreth 48 mijë shtetas shqiptarë kanë marrë shtetësi të vendeve të Bashkimit Europian gjatë vitit 2024, duke u renditur të tretët për nga numri i përfituesve, pas sirianëve dhe marokenëve.
Sipas të dhënave të publikuara nga Eurostat, në total rreth 1.2 milion persona fituan shtetësi në vendet e BE-së gjatë vitit të kaluar. Sirianët përbënin grupin më të madh me rreth 110 mijë shtetësi të dhëna, të ndjekur nga shtetasit marokenë me rreth 97 mijë. Shqiptarët renditen të tretët me 48 mijë raste.
Të dhënat tregojnë gjithashtu se norma më e lartë e natyralizimit në raport me popullsinë jo-shtetase është regjistruar në Suedi, e ndjekur nga Italia dhe Spanja së bashku me Holandën.
Norma e natyralizimit mat numrin e personave që marrin shtetësi gjatë një viti në raport me numrin total të të huajve rezidentë në fillim të vitit, duke dhënë një tregues të qartë mbi integrimin dhe lëvizjet migratore në vendet e BE-së. /skyweb.al
