Ndërsa në Tiranë vijojnë protestat kundër projektit në Zvërnec dhe kërkesat për dorëheqjen e qeverisë, kryeministri Edi Rama është shfaqur në Fier krah Belinda Ballukut, ku ka komentuar sërish reagimet qytetare.
Rama tha se protesta, nëse ka shqetësim real për Sazanin, Zvërnecin, biodiversitetin dhe flamingot, duhet të kërkojë dialog me ekspertë dhe shpjegime nga qeveria, jo largimin e saj.
“Nëse je në protestë që të mos largohen flamingot, nuk mund të kërkosh të largohet qeveria”, u shpreh Rama.
Sipas tij, kërkesa për dorëheqje përmes asaj që ai e quajti “hesap brutal” ndaj shumicës qeverisëse është një akt që “me Ramën dhe PS nuk funksionon”.
“T’i kërkosh hesap brutal në atë formë një shumice qeverisjeje është guxim shumë i madh, guximi i atij që nuk ka turp”, tha kryeministri.
Rama shtoi se protesta duhet të paraqesë ekspertë dhe pyetje konkrete për projektin, duke kërkuar që qeveria të japë shpjegime “nga A në Zh” për atë që po ndodh dhe çfarë ka ndërmend të bëjë.
