Bashkimi Europian ka vendosur të ndalojë përdorimin e sistemeve të inteligjencës artificiale që krijojnë imazhe nudo të rreme, në një lëvizje të fortë ligjore pas reagimeve globale ndaj përhapjes së përmbajtjeve jo konsensuale të gjeneruara nga teknologjia.
Vendimi vjen pas polemikave të forta të shkaktuara nga një funksion i chatbot-it Grok, i zhvilluar nga Elon Musk, i cili u lejonte përdoruesve të krijonin imazhe intime të rreme duke përdorur fotografi reale, pa miratimin e personave që shfaqeshin në to, përfshirë edhe raste që ngritën shqetësime serioze për mbrojtjen e të miturve.
Eurodeputeti irlandez Michael McNamara deklaroi se ky është një moment kyç për vendosjen e kufijve të qartë në përdorimin e inteligjencës artificiale.
“BE vendosi sot një vijë të kuqe. Inteligjenca artificiale nuk duhet të përdoret kurrë për të turpëruar, shfrytëzuar apo rrezikuar njerëzit. Për herë të parë, legjislacioni europian ndalon në mënyrë specifike aplikacione të përdorura për situata denigruese”, u shpreh ai.
Ndërkohë, edhe kryeministrja italiane Giorgia Meloni ka reaguar publikisht ditët e fundit, duke denoncuar publikimin e imazheve të rreme intime të krijuara me AI dhe duke i cilësuar ato si një “mjet tejet të rrezikshëm”.
Ndalimi do të përfshihet në kuadrin e rregullave të reja të Bashkimit Europian për inteligjencën artificiale, të miratuara në vitin 2024, duke forcuar më tej kontrollin mbi përdorimin e teknologjive që cenojnë privatësinë dhe dinjitetin e individit.
Zhvillimi vjen në një moment kur modelet e inteligjencës artificiale po përballen me një mbikëqyrje gjithnjë e më të fortë në Europë. Së fundmi, kompania amerikane Anthropic kufizoi publikimin e modelit të saj Mythos, për shkak të shqetësimeve se mund të përdorej nga hakerët.
Në të njëjtën kohë, rreth 30 eurodeputetë nga grupe të ndryshme politike i kanë kërkuar Komisionit Europian të rishikojë rregullat e sigurisë kibernetike, duke shtuar presionin për një qasje më të rreptë ndaj rreziqeve që vijnë nga inteligjenca artificiale. /skyweb.al
