Dëmshpërblimet në tregun e sigurimeve iu afruan 6 miliardë lekëve gjatë tetë muajve të parë të vitit 2026. Sipas Autoritetit të Mbikëqyrjes Financiare, pagesat arritën në 5.96 miliardë lekë, duke shënuar rritje prej 9.04% kundrejt janar–gushtit 2025.
Në sigurimet motorike, për çdo dëm të paguar rezulton një vlerë mesatare prej rreth 170 mijë lekësh. Raporti statistikor i AMF-së tregon se ky tregues ndryshoi pak në krahasim me një vit më parë, me rritje prej vetëm 0.7%.
Lëvizje më të forta shënuan kategoritë brenda këtij segmenti. Mesatarja për sigurimin e detyrueshëm të automjeteve brenda vendit u ngjit në rreth 175 mijë lekë, ose 8.3% më shumë. Në kahun e kundërt eci Kasko, ku vlera për rast zbriti në rreth 103 mijë lekë, me një tkurrje prej 14.3%.
Për sigurimet e jo-jetës në tërësi, kompensimi mesatar ishte rreth 111 mijë lekë, me rritje prej 4.8%. Shumat përfaqësojnë mesatare statistikore të dëmeve të paguara; kompensimi konkret ndryshon nga një rast në tjetrin.
Sigurimet e jo-jetës përqendruan mbi 92% të dëmshpërblimeve, me pagesa prej rreth 5.51 miliardë lekësh. Vetëm sigurimet e detyrueshme motorike gjeneruan 3.88 miliardë lekë pagesa, duke ruajtur peshën kryesore në këtë treg. /skyweb.al
