Qeveria shqiptare ka paralajmëruar ndërhyrje të mëtejshme në rast të një rritjeje të re të çmimeve të karburanteve, duke përdorur si mekanizëm kryesor uljen e akcizës dhe masa të tjera mbështetëse për konsumatorët.
Ministri i Financave, Petrit Malaj, bëri të ditur në Kuvend se deri më tani Bordi i Transparencës ka zhvilluar 16 mbledhje për përcaktimin e çmimeve tavan të shitjes së karburanteve, ndërsa në vetëm dy raste është aplikuar ulja e akcizës si masë shtesë për lehtësimin e çmimeve.
Sipas tij, akti normativ i miratuar parashikon që nëse çmimi i naftës kalon mbi 220 lekë për litër dhe ai i benzinës mbi 200 lekë për litër, atëherë aktivizohet automatikisht ulja e akcizës me 20%, ose rreth 7.8 lekë për litër. Kjo ulje shoqërohet edhe me reduktim të TVSH-së në import me rreth 1.58 lekë për litër, duke e çuar efektin total të uljes së taksave në rreth 9.45 lekë për litër.
“Ky është një mekanizëm i drejtpërdrejtë për të zbutur rritjen e çmimeve për konsumatorin final”, u shpreh Malaj, duke shtuar se kostoja për buxhetin nga aplikimi i kësaj mase ka qenë rreth 37 milionë lekë të ardhura të munguara nga akciza, një nivel i konsideruar i përballueshëm.
Ministri theksoi se autoritetet po ndjekin nga afër edhe zhvillimet e inflacionit, i cili në muajin mars rezultoi në nivelin 2.6%, brenda objektivit të Bankës së Shqipërisë dhe në përputhje me vlerësimet e Fondit Monetar Ndërkombëtar.
Ai paralajmëroi se nëse situata përshkallëzohet më tej, qeveria do të ndërmarrë masa të tjera, të fokusuara kryesisht tek shtresat më në nevojë, duke ruajtur njëkohësisht stabilitetin fiskal dhe makroekonomik.
Sipas Malajt, çdo paketë e re masash do të hartohet në konsultim të ngushtë me partnerët ndërkombëtarë, përfshirë Fondin Monetar Ndërkombëtar, për të garantuar besueshmërinë dhe efektivitetin e ndërhyrjeve në treg.
