Shqipëria nuk rrezikohet nga mungesa e furnizimit me hidrokarbure. Garancia u dha nga ministri i Infrastrukturës dhe Energjisë, Enea Karakaçi, gjatë një interpelance në Kuvend, ku theksoi se vendi nuk është i ekspozuar ndaj këtij risku.
Sipas tij, siguria energjetike mbetet një prioritet kombëtar dhe masat e ndërmarra nga qeveria për përballimin e krizave janë të shumëanshme. Në këtë kuadër, është ngritur edhe bordi i transparencës, i cili synon mbrojtjen e konsumatorit final nga luhatjet e çmimeve.
Ministri bëri të ditur se, bazuar në legjislacionin në fuqi, është ngritur një grup pune që do të kryejë verifikime në terren për mbajtjen e rezervave të sigurisë nga kompanitë që operojnë në tregun e hidrokarbureve.
Ndërkohë, në planin afatgjatë, qeveria ka hedhur për konsultim publik një draft të ri ligjor, i cili ndryshon modelin aktual të menaxhimit të rezervave. Sipas këtij propozimi, rezervat e hidrokarbureve nuk do të mbahen më nga shoqëritë tregtare, por do të kalojnë nën administrimin e agjencive shtetërore.
“Ky është një standard i ri për Shqipërinë. Rezerva e sigurisë do të jetë funksionale në rast mungese në treg, por aktualisht nuk ka asnjë problem me furnizimin”, u shpreh Karakaçi.
Në të njëjtën kohë, ministri njoftoi se javën e ardhshme pritet të hyjë në fuqi plani i masave për transportin publik urban dhe interurban, pas përfundimit të konsultimeve me grupet e interesit.
