Shtigjet natyrore, fauna e pasur dhe bukuritë natyrore të Parkut Kombëtar Divjakë-Karavasta ftojnë turistët çdo ditë të vitit ta vizitojnë.
Turizmi i natyrës, ecjet e gjata, fauna dhe plazhi, janë disa nga atraksionet që parku ofron për vizitorët.
Drejtori i Administratës së Zonave të Mbrojtura, Fotjon Prençe tha për ATSH-në se “nga janari deri në tetor ky park u vizitua nga 428.000 turistë, nga të cilët 305.620 vendas dhe 117.780 të huaj. Vetëm në muajin tetor ky park u vizitua nga 22.800 vizitorë, ndërsa muaji me fluksin më të lartë të vizitorëve është korriku me 52.100 vizitorë”.
“Ky park është më i vizituari në vendin tonë. Turistët e huaj që vizitojnë parkun janë nga vende të ndryshme të Evropës, si Spanja, Gjermania, Holanda, Kroacia, Italia, ndërsa këtë vit ka pasur një fluks të lartë të turistëve izraelitë”, tha Prençe.
Përveç plazhit vizitorët vendas dhe turistët e huaj kryejnë edhe një sërë aktivitetesh të tjera si: vëzhgim zogjsh (birdwhatching), ecje në shtigjet e parkut, xhiro me kajak, xhiro me biçikleta, vëzhgim të bimëve endemike të parkut, lindjen dhe perëndimin e diellit etj.”.
Në vizitat e tyre ata shoqërohen edhe nga guidat turistike, të cilët i njohin ata me vlerat e parkut.
Administratori i guidës turistike Divjakë-Karavasta, Altin Hila, tha për ATSH-në se “vizitorët që zgjedhin të vizitojnë Divjakën kanë preferenca sipas dëshirave, por edhe sipas profesioneve që ata kanë. Divjakë-Karavastaja i ka të gjitha atraksionet që i duhen vizitorëve. Nëse do të kishte një strukturë të mirë marketingu dhe një infrastrukturë menaxhimi e them me bindje të plotë që do të ishte konkurruese apo edhe në majën e turizmit shqiptar”.
Turistët tregojnë interes për faunën, me shpendët e kafshët si pelikanët, flamingot, zogjtë specifikë të pafundmë, për kafshët e egra, ku interes ka çakalli i artë, buallicat.
“Një vend të veçantë në guidat që turistët zgjedhin zë edhe flora e shumtë e çdo stine si orkidetë, bimët mjekësore, bimët endemike, kërpudhat, llojet e myshqeve dhe likeneve, frutat e pyllit etj.; dunat e rërës me bimësinë tipike, ku kemi tre specie endemike shumë të kërkuara nga vizitorët, por edhe lagunat, ligatinat etj.”, tha Hila.
Hila tregon se preferohen edhe sportet komplekse si sportet e ujit, sërfi, parashutat e ujit dhe të ajrit, peshkimi sportiv, hipizmi bregdetar.
Me një kullë panoramike, varka për të shëtitur, vijë ujore përgjatë gjithë parkut, pyllin e gjelbëruar dhe me larmishmëri shpendësh janë disa nga aventurat që nuk duhen humbur kur viziton këtë park të rijetësuar.
Divjaka sot është një nga parqet natyrore më të vizituara të vendit për turizmin detar, natyror, të peizazhit, atë të vëzhgimit të shpendëve ujorë dhe të historisë./ATSH
