Avioni presidencial amerikan “Air Force One”, që mbante Presidentin Donald Trump në udhëtim drejt Forumi Ekonomik Botëror në Davos, Zvicër, u detyrua të kthehej në bazën Andrews të Uashingtonit pak pasi ishte nisur mbrëmjen e kaluar për shkak të një problemi të vogël elektrik të identifikuar nga ekuipazhi.
Zëdhënësja e Shtëpisë së Bardhë, Karoline Leavitt, tha se për arsye sigurie u vendos që avioni të mos vazhdonte fluturimin derisa defekti të zbulohej dhe rreziqet të evitoheshin. Trump dhe anëtarët e delegacionit u desh të zbresin dhe të hipnin në një avion tjetër për të vazhduar drejt Zvicrës.
Incidenti teknik pritet të sjellë vonesa në axhendën e Trump në Davos, ku ai pritet të mbajë fjalime dhe të zhvillojë takime me udhëheqës të tjerë botërorë në samitin ekonomik.
Zyrtarë të Shtëpisë së Bardhë theksuan se problemi nuk ka qenë serioz dhe se masa ishte marrë thjesht si parapërgatitje për sigurinë e presidentit dhe stafit. /skyweb.al
