Inspektori i Përgjithshëm i Ushtrisë Gjermane, Carsten Breuer, nënvizoi rëndësinë e vlerësimit të të gjithë të rinjve meshkuj për shërbimin ushtarak, si një mënyrë për të shmangur humbjen e kohës në rast emergjence mbrojtëse.
“Nga perspektiva ushtarake, është thelbësore që të vlerësohet e gjithë grupmosha. Vetëm kështu mund të dimë se kush është i disponueshëm dhe kë mund të thërrasim në rast nevoje, situatë që synojmë ta parandalojmë,” tha Breuer në një intervistë për grupin mediatik “RND”.
Edhe ministri gjerman i Mbrojtjes, Boris Pistorius, shprehu mbështetjen e tij për kryerjen e vlerësimeve kombëtare të të rinjve meshkuj.
Breuer paralajmëroi se kryerja e këtyre vlerësimeve vetëm gjatë një krize do të sillte humbje kohe të çmuar. “Askush sot nuk mund të parashikojë me siguri se si do të jetë situata e sigurisë dhe kërcënimeve në vitet e ardhshme,” shtoi ai.
Sipas planit aktual, ligji i ri për shërbimin ushtarak në Gjermani, që pritet të hyjë në fuqi më 1 janar, do të bazohet fillimisht në vullnetarizëm. Ligjvënësit e koalicionit qeverisës kanë propozuar që të rinjtë të përzgjidhen me short për vlerësim dhe, nëse numri i vullnetarëve nuk mjafton, të përzgjidhen po rastësisht edhe për shërbim të detyrueshëm.
Megjithatë, Breuer theksoi se ushtria nuk duhet të kufizojë opsionet e saj operacionale. “Qëllimi ynë mbetet mbështetja te vullnetarët, por në rast se kjo nuk mjafton dhe qeveria dhe Bundestagu vendosin thirrje të detyrueshme, ne do të përzgjedhim ata që janë më të kualifikuar dhe të motivuar, sipas nevojave reale, jo thjesht në mënyrë të rastësishme,” tha ai.
