Komisioni i Prokurimit Publik ka zhbllokuar dje pas gati një viti, një nga tenderët më të debatueshëm të AKSHI, me vlerë rreth 2.4 milionë euro, duke i hapur rrugën vijimit të vlerësimit të ofertave. Bëhet fjalë për tenderin
“Përmirësimi dhe Integrimi i Sistemeve të Menaxhimit të Informacionit për Ndihmën Ekonomike, Personat me aftësi të Kufizuar dhe Shërbimit Social” me fond limit rreth 2.4 milionë euro.
Vendimi vjen pikërisht pak ditë pasi TRE emrat kryesorë të skemës së dyshuar së tenderëve të teknologjisë së informacionit të AKSHI-t, Mirlinda Karçanaj, Ermal Beqiri dhe Gerond Meç përballeshin me goditjen më të fortë nga SPAK.
Historia nis në dhjetor 2024
Pas shpalljes së procedurës në dhjetor 2024, fillimisht, në qershor 2025, në këtë tender u shpall fituese bashkimi i kompanive Advanced Business Solutions (ABS) dhe Synapse, me një ofertë rreth 1.9 milionë euro. Pak ditë më pas, AKSHI vendosi ta anulonte procedurën duke me arsyetimin se kishte gjetur “mungesa në dokumentacion”, duke e kthyer tenderin nga e para.
Vendim i KVO-së së AKSHI-t nxiti ankimin nga ABS dhe Synapse që u drejtuan në KPP. KPP ndërkohë vendosi në korrik pezullimin e çdo hapi të AKSHI deri në sqarimin e shkeljeve.
Në garë, përveç ABS dhe Synapse, kishte edhe një bashkim tjetër operatorësh: IMAGE & COMMUNICATION DEVELOPMENT dhe HardTech shpk, me një ofertë rreth 2.3 milionë euro.
Si në shumë tenderë të AKSHI, e pranishme ishte edhe NAOL shpk, e cila shpreh interes, por nuk dorëzon ofertë, duke ushqyer dyshimet se kjo kompani shërben thjesht për të krijuar fasadën e konkurrencës.
Koha që shënoi zhbllokimin e tenderit u përputh në mënyrë domethënëse me zhvillimet në SPAK: Mirlinda Karçanaj ishte duke u marrë në pyetje për rreth tre orë nga prokurori Bledar Maksuti, në lidhje me të paktën 12 tenderë të dyshuar si problematikë. Ndërkohë, Ermal Beqiri, pronar i Soft & Solutio, kompania e favorizuar sistematikisht në tenderët e AKSHI, përballej me pasojat e një hetimi që po prek pikërisht zemrën e skemës.
Sipas burimeve të Skyweb.al, SPAK po verifikon edhe rolin e ABS, pasi kompania e Gerond Meçes, Advanced Business Solutions, është një nga përfituesit më të mëdhenj të tenderëve të AKSHI.
Hetuesit po shqyrtojnë arsyet pse Meçe, i cili kishte dorëzuar ankesa të njëpasnjëshme kundër procedurave të AKSHI, u tërhoq papritur nga të gjitha ankimet, duke ngritur dyshime për marrëveshje në prapaskenë.
Me vendimin e KPP-së, tenderi i ngrirë prej muajsh kthehet në procedurë dhe AKSHI duhet të vlerësojë ofertat nga fillimi.
Mbetet për t’u parë tani çfarë ndodhmne fonde publike te AKSHI që jane4 zhvatur deri më tani pe asnjë kriter nga dy tre kompani të lidhura pikërisht me Beqirin, Meçen dhe “shefin” e Karçanajt teksa SPAK po patrullon mbi kokat e tyre….. /skyweb.al
