Autoriteti i Konkurrencës ka nisur monitorimin e çmimeve të mallrave bazë të shportës së konsumatorit, një proces që ka filluar nga dita e djeshme dhe do të vijojë deri më 15 janar. Fokusi i këtij monitorimi është periudha e festave të fundvitit, kur tradicionalisht vihet re rritje e kërkesës dhe luhatje e çmimeve në treg.
Sipas njoftimit zyrtar, qëllimi i monitorimit është parandalimi i çdo rritjeje të pajustifikuar të çmimeve, si dhe identifikimi i praktikave të ndaluara ose të bashkërenduara mes distributorëve, tregtarëve me shumicë dhe rrjeteve të supermarketeve, të cilat mund të dëmtojnë interesat e konsumatorëve.
Produktet që janë përfshirë në këtë proces monitorimi janë mallra bazë të konsumit të përditshëm, konkretisht makarona, oriz, miell, vezë, sheqer, vaj ushqimor dhe pije joalkolike.
Autoriteti i Konkurrencës bën me dije se do të ndjekë nga afër zhvillimet në treg gjatë kësaj periudhe dhe se publiku do të informohet për çdo masë që mund të ndërmerret në rast se konstatohen shkelje apo deformime të konkurrencës në dëm të konsumatorëve. /skyweb.al
