Banka Shqiptare e Zhvillimit është regjistruar si shoqëri aksionare në Qendrën Kombëtare të Biznesit, duke shënuar themelimin e saj zyrtar dhe marrjen e statusit aktiv që nga data 16 dhjetor, pa afat.
Sipas të dhënave të regjistrimit, Banka Shqiptare e Zhvillimit funksionon me një sistem administrimi me dy nivele. Niveli i parë është Administratori, ndërsa niveli i dytë është Këshilli Mbikëqyrës.
Administrator i bankës është emëruar italiani Silvio Pedrazzi, ish drejtues i një banke me kapital të huaj në Shqipëri. Mandati i tij është trevjeçar, nga 16 dhjetor 2025 deri më 16 dhjetor 2028.
Këshilli Mbikëqyrës përbëhet nga pesë anëtarë: Daniel Demeulenaere, Artur Asllani, Arben Shkodra, Eris Hysi dhe Irida Huta, të emëruar gjithashtu për një mandat trevjeçar.
Ministria e Financave rezulton aksionare e vetme e Bankës Shqiptare të Zhvillimit, duke zotëruar 100 për qind të aksioneve. Kapitali fillestar i bankës është 10 miliardë lekë.
Banka Shqiptare e Zhvillimit do të ushtrojë veprimtari kredidhënieje për ndërmarrjet e vogla dhe të mesme dhe startup-et vendase, me synim nxitjen e rritjes, produktivitetit, konkurrueshmërisë dhe zgjerimit në tregjet ndërkombëtare.
Veprimtaria përfshin gjithashtu mbështetjen e eksporteve të mallrave dhe shërbimeve vendase, kredidhënien për projekte publike në nivel qendror dhe vendor, si dhe financimin e zhvillimit, përmirësimit dhe modernizimit të infrastrukturës fizike dhe digjitale të vendit, në përputhje me objektivat strategjikë kombëtarë.
Në kuadër të aktivitetit të saj, banka mund të akordojë kredi afatshkurtra dhe afatmesme e afatgjata për persona juridikë, drejtpërdrejt ose përmes marrëveshjeve të bashkëfinancimit me institucione financiare vendase dhe ndërkombëtare.
Ajo mund të lëshojë garanci financiare dhe tregtare, të blejë obligacione korporatash, të marrë pjesë në instrumente financiare të kapitalit, të investojë tepricat e likuiditetit në obligacione qeveritare vendase dhe ndërkombëtare, si dhe të hapë llogari dhe të vendosë depozita në banka tregtare.
Në aspektin e financimit dhe detyrimeve, Banka Shqiptare e Zhvillimit ka të drejtë të emetojë obligacione në tregjet financiare vendase dhe ndërkombëtare, të pranojë depozita nga bankat dhe institucionet financiare, të ketë akses në operacionet e politikës monetare të Bankës së Shqipërisë, të administrojë fonde strukturore nga shteti ose institucionet supranacionale, si dhe të pranojë fonde të kthyeshme nga publiku përmes produkteve të kursimit, nëpërmjet një entiteti të veçantë të Postës Shqiptare sh.a. Këto produkte kursimi garantohen nga shteti dhe përdoren për aktivitete promovuese.
Selia e Bankës Shqiptare të Zhvillimit do të jetë në Bulevardin “Dëshmorët e Kombit”, Ndërtesa nr. 3. /skyweb.al
