Bizneset e lidhura në nivelin e tensionit 6 kilovolt do të duhet të sigurojnë vetë furnizimin me energji elektrike në tregun e lirë, duke kontraktuar një furnizues privat, duke nisur nga data 1 janar 2026.
Pas njoftimeve të përsëritura nga shoqëritë e OSHEE Group, edhe Enti Rregullator i Energjisë u ka kërkuar këtyre subjekteve që të marrin masat e nevojshme për t’u përshtatur me fazën e fundit të procesit të liberalizimit të tregut të energjisë.
Sipas njoftimit të ERE-s, nga 1 janari 2026, klientët e lidhur në tension 6 kV, të cilët plotësojnë kriteret ligjore dhe teknike për daljen në tregun e liberalizuar, kanë detyrimin të gjejnë dhe të kontraktojnë furnizuesin e tyre në tregun e lirë të energjisë elektrike. Rregullatori u bën thirrje të gjithë konsumatorëve që i përkasin kësaj kategorie, si edhe çdo konsumatori tjetër që ka plotësuar kriteret për daljen në treg të lirë, të ndërmarrin në kohë hapat për përzgjedhjen e furnizuesit nga lista e subjekteve të licencuara.
ERE sqaron se në faqen zyrtare të institucionit janë të publikuara të dhënat e furnizuesve të licencuar, si edhe modalitetet për kontaktimin dhe kontraktimin e tyre. Paralelisht, konsumatorët mund të përdorin edhe platformën e krahasimit të çmimeve PCT, të ndërtuar nga ERE, për të gjetur ofertat më të përshtatshme të furnizimit për kategorinë përkatëse.
Rregullatori thekson se konsumatorët që kanë plotësuar kriteret për daljen në treg të lirë, por nuk kanë mundur të kontraktojnë një furnizues ose kanë humbur furnizuesin aktual, mund të përfitojnë përkohësisht nga shërbimi i Furnizuesit të Mundësisë së Fundit. Ky furnizim ofrohet për një periudhë të kufizuar prej 60 ditësh, në kushte të rregulluara, në përputhje me legjislacionin e sektorit të energjisë elektrike.
Në çdo rast, subjektet kanë të drejtën ligjore të ndryshojnë furnizuesin e energjisë pa pagesë shtesë, sa herë që e shohin të arsyeshme.
Procesi i liberalizimit të tregut të energjisë ka nisur që në vitin 2018, fillimisht me bizneset e lidhura në tension 35 kilovolt. Më pas, liberalizimi është zgjeruar në disa faza, duke përfshirë bizneset në tension 20 kilovolt dhe 10 kilovolt. Në fazën aktuale, rreth 2300 subjekte të lidhura në tension 6 kilovolt janë të verifikuara për daljen në treg të lirë, ndërsa një numër tjetër ndodhet ende në proces verifikimi për shkak të detyrimeve të prapambetura ndaj furnizuesit aktual.
/skyweb.al
