Gjatë periudhës janar–nëntor 2025 janë regjistruar gjithsej 18,095 mjete me moshë nga 0 deri në 4 vite, duke shënuar një rritje prej 62 për qind krahasuar me të njëjtën periudhë të vitit 2023.
Të dhënat janë bërë publike nga Drejtoria e Përgjithshme e Shërbimeve të Transportit Rrugor, e cila vlerëson se ky zhvillim tregon një rinovim të ndjeshëm të flotës së automjeteve që qarkullojnë në vend.
Sipas institucionit, rritja e numrit të mjeteve të reja ose relativisht të reja përfaqëson një hap drejt përmirësimit të sigurisë rrugore dhe reduktimit të ndotjes mjedisore.
Autoritetet theksojnë se tendenca e rritjes së regjistrimeve të mjeteve të gjeneratës së fundit reflekton ndryshime në sjelljen e konsumatorëve, por edhe ndikimin e politikave që favorizojnë automjete më të sigurta dhe më miqësore me mjedisin.
Sipas DPSHTRR-së, ky trend pritet të ketë ndikim pozitiv në cilësinë e qarkullimit rrugor, standardet e sigurisë dhe uljen graduale të flotës së vjetër të automjeteve që vijojnë të qarkullojnë në vend. /skyweb.al
