Çmimi i arit ka arritur nivelin më të lartë në histori, duke u rritur në 3,600 dollarë për ons, si pasojë e një kombinimi faktorësh ekonomikë dhe politikë.
Sipas Financial Times, ari është rritur me 9% vetëm në tre javët e fundit dhe me 37% që prej fillimit të vitit.
Kjo rritje e shpejtë lidhet kryesisht me shqetësimet për inflacionin në SHBA dhe borxhin publik gjithnjë në rritje, të cilat kanë ulur tërheqjen e dollarit si mjet ruajtjeje vlere.
Një tjetër faktor kyç është politika monetare.
Norma më të ulëta interesi e shtyjnë çmimin e arit lart, pasi investitorët, duke parashikuar kthime më të ulëta nga obligacionet, i drejtohen arit si aset më të sigurt. Për më tepër, frika nga stagflacioni, kombinimi i inflacionit të lartë me rritje të ngadaltë ekonomike, po e bën arin edhe më tërheqës.
Sipas analizave, ndikim kanë pasur edhe pasojat e tarifave tregtare të Donald Trump, të cilat po fillojnë të ndihen në ekonominë amerikane.
Në këtë klimë pasigurie, ari shihet gjithnjë e më shumë si “strehë e sigurt” për kapitalin.
Ekspertët parashikojnë se nëse tendencat aktuale vijojnë, çmimi i arit mund të ruajë luhatje të forta, por mbetet një nga asetet më të qëndrueshme në kohë krizash. /skyweb.al
