Skemat e pagesës me këste për detyrimet e prapambetura ndaj Furnizuesit të Shërbimit Universal (FSHU) dhe Operatorit të Sistemit të Shpërndarjes së Energjisë Elektrike (OSSH) po rezultojnë një mbështetje e rëndësishme për bizneset dhe familjet shqiptare. Ato synojnë të lehtësojnë barrën financiare dhe të formalizojnë marrëdhëniet me institucionet energjetike.
Rreth 1,000 subjekte kanë përfituar nga këto skema gjatë vitit të fundit, duke përfshirë edhe reduktime të kamatëvonesave nga 50% deri në 100% për pagesat e kryera me një këst të vetëm. Ndërkohë, që prej korrikut 2024, OSHEE Group ka zbatuar aktmarrëveshje të reja për shlyerjen me këste të borxheve të akumuluara deri më 31 dhjetor 2023, duke favorizuar shtresat në nevojë dhe biznesin e vogël.
Familjet me ndihmë ekonomike, pensionistët kryefamiljarë dhe personat me status të veçantë mund të shlyejnë detyrimet me këste mujore që nisin nga 1,200 lekë, ndërsa klientët e tjerë familjarë me këste që fillojnë nga 2,800 lekë.
Numri maksimal i kësteve nuk mund të kalojë 240, por çdo abonent ka mundësinë të zgjedhë një pagesë më të lartë se shuma minimale mujore. Për të përfituar nga këto skema, është e nevojshme që abonentët të kenë shlyer detyrimet për vitin 2024 dhe për muajt e parë të vitit 2025.
Autoritetet bëjnë thirrje për abonentët me detyrime të prapambetura të përfitojnë nga paketat lehtësuese aktuale. /Skyweb.al
