Turizmi solli performancë pozitive në bizneset e lidhura me këtë sektor të ekonomisë. Të dhënat e 7-mujorit të vitit 2025, krahasuar me të njëjtën periudhë të një viti më parë tregojnë rritje të qarkullimit në sektorë si akomodimi, bar-restorantet apo shërbime të tjera.
Deri në muajin korrik, bizneset e lidhura me sektorin e turizmit kanë qarkulluar afro 929.2 milionë euro, 109.9 milionë euro më shumë se në të njëjtën periudhë të një viti më parë, shkruan Skyweb.al.
Sipas të dhënave, xhiroja e deklaruar nga sektori i restoranteve dhe shërbimeve ushqimore, regjistrohet në 456.7 milionë euro. Krahasuar me një vit më parë, rezulton një kapërcim prej 50.3 milionë euro.
Edhe strukturat akomoduese, hotelet, bujtinat apo apartamentet që jepen me qira ditore kanë raportuar një xhiro 331.5 milionë euro, duke regjistruar një rritje prej 43.1 milionë euro në raport me 7 mujorin e 2024-ës.
Të dhënat tregojnë gjithashtu se ky vit është shoqëruar me një rritje të ndjeshme të konsumit nga ana e qytetarëve shqiptarë, por edhe turistëve të huaj që vizitojnë Shqiperinë. Tregues për këtë janë edhe të ardhurat e mbledhura nga Tatimi mbi Vlerën e Shtuar nga administrata tatimore. Kjo tregon qarkullimin e produkteve dhe shërbimeve brenda vendit përmes faturave fiskale dhe 20% e paguar nga konsumatorët.
Në janar-korrik, tatimet kanë mbledhur nga TVSH e brendshme afro 39.2 miliardë lekë, apo 392 milionë euro. Krahasuar me të njëjtën periudhë të një viti më parë, ku u arkëtuan 327 milionë euro nga ky zë, ka një rritje prej 65 milionë euro, e cila për ekonominë shqiptare, nuk është e vogël.
Sipas INSTAT, hyrjet dhe daljet e shtetasve shqiptarë dhe të huaj në 7 mujorin e parë të këtij vitit është përllogaritur 11.2 milionë. / Skyweb.al
