Greqia dhe Izraeli kanë firmosur në Tel Aviv marrëveshjen për ndërtimin e “Mburojës së Akilit”, një sistem të integruar kundërajror, antibalistik dhe kundër dronëve.
Programi, me një buxhet prej 3,035 miliardë eurosh, konsiderohet një nga investimet më të mëdha ushtarake të ndërmarra nga Athina gjatë viteve të fundit. Sistemi pritet të arrijë gatishmërinë e plotë operacionale brenda 35 muajve.
Marrëveshja parashikon ngritjen e një rrjeti të përbashkët komandimi dhe kontrolli, i cili do të lidhë radarët, sensorët dhe raketat për identifikimin, vlerësimin dhe goditjen e kërcënimeve ajrore.
Në qendër të sistemit do të jenë raketat izraelite BARAK MX, me rreze veprimi prej rreth 35, 70 dhe 150 kilometrash, radarët e lëvizshëm EL/M-2084 dhe sistemet SPYDER.
Për përballimin e raketave balistike me rreze të gjatë parashikohet përfshirja e sistemit “David’s Sling”, i cili do të krijojë shtresën e sipërme të mbrojtjes së kupolës greke.
“Mburoja e Akilit” do të lidhet gjithashtu me avionët F-35 dhe F-16 Viper, fregatat Belharra, dronët dhe mjetet e tjera moderne të Forcave të Armatosura greke.
Të paktën 25% e programit, ose rreth 750 milionë euro, do të realizohet me pjesëmarrjen e industrisë greke të mbrojtjes. Në procedurat përkatëse janë përfshirë deri tani 19 kompani vendase.
Marrëveshja synon edhe krijimin e një baze prodhuese në Greqi, transferimin e teknologjisë dhe zhvillimin e kapaciteteve me mundësi eksporti.
Programi është pjesë qendrore e reformës ushtarake “Agjenda 2030”. Ministri grek i Mbrojtjes, Nikos Dendias, deklaroi se Greqia bëhet vendi i parë i Bashkimit Europian që zbaton një sistem të tillë të integruar mbrojtës.
Firmosja e marrëveshjes vjen pas gati tre vitesh negociatash ndërmjet Athinës dhe Tel Avivit. Kompanitë izraelite IAI, Rafael dhe ELTA Systems pritet të nisin menjëherë zbatimin e projekteve përbërëse të kupolës ajrore. /skyweb.al
