Operatori i Blerjeve të Përqendruara (OBP) ka anuluar një nga tenderët më të mëdhenj publikë të muajve të fundit, atë për furnizimin me uniforma dhe këpucë të Policisë së Burgjeve, me një fond limit total prej afro 14 milionë eurosh pa TVSH.
Sezon tenderësh, 14 milion euro për uniformat e Policisë së Burgjeve
Procedura parashikonte nënshkrimin e një marrëveshjeje kuadër 4-vjeçare, të ndarë në dy lote:
Loti I: “Blerje uniforma dhe grada” me fond 12.09 milionë euro pa TVSH;
Loti II: “Blerje këpucë” me fond 1.95 milionë euro pa TVSH.
Vendimi për anulimin e procedurës u mor më 3 qershor 2025 me kërkesë të Drejtorisë së Përgjithshme të Burgjeve dhe është publikuar në Buletinin e Agjencisë së Prokurimit Publik.
Anulimi i beftë
Në dokumentin zyrtar, anulimi justifikohet me klauzolën standarde “rrethana të paparashikueshme dhe objektive” apo “mungesë aftësie paguese” nga autoriteti kontraktor.
Megjithatë, buxheti i shtetit është miratuar më herët, dhe sëfundmi nuk është shënuar asnjë ngjarje financiare e papritur që të justifikojë mungesën e pagesës. Ky vendim përkon me përfundimin e zgjedhjeve dhe fazën e pritjes për riformatimin e kabinetit qeveritar, duke sugjeruar se tenderi është pezulluar për arsye politike e jo buxhetore.
OBP e shpalli këtë tender në prill si një nga procedurat më të rëndësishme të sezonit, për shkak të vlerës së lartë dhe rëndësisë për funksionimin e Policisë së Burgjeve./skyweb.al
