Ashtu siç ishte paralajmëruar më herët, hetimi tatimor ka nisur zyrtarisht kontrollet në terren në sektorin e ndërtimit, me fokus deklarimin e pagave, shitjet e apartamenteve dhe veprimtarinë reale të subjekteve që operojnë në këtë treg.
Gjatë ditës së sotme, Administrata Tatimore ka zhvilluar kontrolle të detajuara në disa prej agjencive imobiliare më të mëdha në vend, duke shënuar fazën e parë të këtij aksioni që synon formalizimin e sektorit.
Sipas njoftimit zyrtar, kontrollet janë përqendruar në verifikimin e punonjësve të padeklaruar, pagave jo reale, mungesës së faturimit, si dhe dyshimeve për evazion tatimor në shitjen e apartamenteve.
Administrata Tatimore bën me dije se aksioni nuk është i përkohshëm dhe do të vijojë pa tolerancë, duke paralajmëruar masa administrative dhe penale për subjektet që rezultojnë në shkelje.
Autoritetet tatimore u kanë bërë thirrje subjekteve të sektorit që të deklarojnë pagat reale dhe aktivitetin e vërtetë ekonomik, në mënyrë që të shmangen penalitetet dhe ndëshkimet ligjore.
Kontrollet pritet të shtrihen edhe në faza të tjera të zinxhirit të ndërtimit, përfshirë kompanitë ndërtuese, ndërmjetësit dhe subjektet e lidhura me procesin e shitblerjes së pasurive të paluajtshme. /skyweb.al
