Korridori VIII, që nis nga kompleksi portual Durrës–Porto Romano dhe shtrihet drejt Detit të Zi, është përfshirë zyrtarisht në planet e infrastrukturës kritike ushtarake të NATO-s, duke u njohur si një korridor sigurie në funksion të mbrojtjes kolektive të Aleancës.
Lajmi u bë publik nga ministri i Mbrojtjes Pirro Vengu në përfundim të Ministerialit të Ministrave të Mbrojtjes të vendeve anëtare të NATO-s, të zhvilluar në Bruksel.
Sipas Vengut, përfshirja e Korridorit VIII në infrastrukturën prioritare të NATO e pozicionon Shqipërinë si një nyje strategjike në arkitekturën e sigurisë euroatlantike dhe e vendos vendin në qendër të planeve rajonale dhe investimeve që Aleanca pritet të përqendrojë në vitet e ardhshme.
Ministri theksoi se vendimi është rezultat i një pune të gjatë dhe të qëndrueshme institucionale, duke e cilësuar atë si një arritje konkrete që rrit peshën strategjike të Shqipërisë në rajon.
Sipas tij, përfshirja e këtij korridori në hartën e infrastrukturës ushtarake të NATO-s do të ndikojë jo vetëm në dimensionin e sigurisë, por edhe në zhvillimin e mëtejshëm të infrastrukturës kombëtare, në përputhje me standardet dhe kërkesat e Aleancës.
Korridori VIII konsiderohet një aks kyç që lidh Adriatikun me Detin e Zi, duke krijuar një rrjet të integruar transporti dhe lëvizshmërie, me rëndësi të veçantë për mobilitetin ushtarak dhe reagimin e shpejtë në kuadër të mbrojtjes kolektive.
Përfshirja e tij në planet strategjike të NATO-s pritet të forcojë rolin e Shqipërisë në strukturat e sigurisë euroatlantike dhe të nxisë investime të reja infrastrukturore në rajon. /skyweb.al
