Një turist i huaj ka ndarë një histori pozitive nga qëndrimi i tij në Tiranë, duke vlerësuar ndershmërinë e shqiptarëve pas një incidenti që, sipas tij, mund të kishte përfunduar ndryshe në shumë vende të tjera.
Në një intervistë të realizuar në qendër të kryeqytetit për faqen Cycle Tirana, ai tregoi se kishte harruar portofolin në një makinë me qira dhe e kishte kuptuar mungesën e tij vetëm pasi mbërriti në hotel.
View this post on Instagram
Sipas rrëfimit të tij, në momentin që arriti në dhomë konstatoi se nuk kishte asnjë para me vete. Ai njoftoi recepsionin e hotelit, i cili kontaktoi kompaninë. Kompania, nga ana e saj, telefonoi shoferin.
“Shqiptarët janë njerëz shumë të ndershëm. Më kishte rënë portofoli me të gjitha paratë në një makinë me qira dhe kur u ktheva në hotel pashë që nuk kisha asgjë me vete. I thashë recepsionit dhe ata telefonuan kompaninë. Shoferi tha se e kishte gjetur në makinë dhe erdhi posaçërisht për të ma kthyer. Kjo nuk do të më kishte ndodhur kurrë në vendin tim”, u shpreh ai.
Sipas turistit, portofoli iu dorëzua me të gjitha paratë dhe dokumentet brenda, pa asnjë mungesë. Historia e tij është shpërndarë gjerësisht në rrjetet sociale, duke sjellë një tjetër shembull pozitiv për imazhin e vendit në sytë e vizitorëve të huaj. /skyweb.al
