Administrata Tatimore ka bërë një njoftim për individët që janë subjekt i deklarimit të të ardhurave përmes formularit DIVA 2025, duke rikujtuar detyrimin për të deklaruar çdo të ardhur të realizuar gjatë vitit, përfshirë ato të përfituara përmes platformave digjitale.
Sipas njoftimit, në deklarim duhet të përfshihen të gjitha pagesat e marra përmes llogarive bankare apo formave të tjera të pagesës, fizike apo elektronike, përfshirë të ardhurat nga platformat Meta si Facebook, Instagram dhe WhatsApp, Google, YouTube, si edhe shërbimet e qiradhënies dhe rezervimeve si Airbnb dhe Booking.
Administrata Tatimore thekson se disponon të dhëna mbi të ardhurat e qarkulluara përmes këtyre platformave dhe paralajmëron se mosdeklarimi do të shoqërohet me penalitetet e parashikuara nga legjislacioni në fuqi.
Afati për dorëzimin e deklaratës DIVA 2025 është caktuar data 31 mars 2026, ndërsa qytetarët mund të marrin informacion shtesë në faqen zyrtare të administratës./skyweb.al
