Një sasi e madhe çokollatash që tentonte të hynte në tregun shqiptar pa asnjë dokumentacion është bllokuar nga Drejtoria e Antikontrabandës në pikën kufitare të Kapshticës.
Sipas njoftimit të doganave, një mjet transporti ka kaluar në degën doganore pa kryer deklarim dhe pa paraqitur dokumente shoqëruese për mallin që transportonte. Dyshimet për kontrabandë çuan në kontrollin e plotë të automjetit nga autoritetet.
Gjatë verifikimeve u zbulua se në mjet ndodheshin 566 kuti me çokollata, me një peshë totale rreth 1.5 ton. Malli dyshohet se synonte të hidhej në treg pa kaluar procedurat doganore dhe pa u paguar detyrimet përkatëse.
Sasia e çokollatave është sekuestruar, ndërsa strukturat hetimore të doganave kanë nisur procedurat përkatëse për ndjekjen e rastit.
Autoritetet bëjnë të ditur se hetimet po vijojnë për të dokumentuar plotësisht rastin dhe për të referuar çështjen për procedim penal pranë organeve kompetente. /skyweb.al
