Ekonomia shqiptare u rrit me 3,51% në tremujorin e dytë të vitit 2025, por të dhënat e INSTAT tregojnë se sektori i ndërtimit po humb gradualisht vrullin që e ka karakterizuar vitet e fundit. Në këtë tremujor, ndërtimi u rrit me vetëm 2,68%, duke kontribuar me +0,30 pikë përqindje në PBB, ndjeshëm më pak se në periudhat e mëparshme.
Sipas publikimeve të INSTAT, ndërtimi ishte një ndër shtytësit kryesorë të rritjes ekonomike gjatë vitit 2024. Në tremujorin e dytë të atij viti, sektori dha një kontribut të lartë prej +1,43 pikë përqindje, ndërsa edhe në tremujorin e katërt rezultoi me +0,89 pikë përqindje. Në tremujorin e parë të 2025, ndërtimi vijoi në rritje mbi 3%, përpara se të ngadalësohej dukshëm në muajt prill–qershor.
Krahasuar me këtë performancë, të dhënat e tremujorit të dytë 2025 tregojnë një kthesë drejt moderimit, duke sinjalizuar se sektori po përballet me ngopje të tregut, rritje të kostove apo kushte më të vështira financimi.
Ndërkohë, administrata publike, arsimi dhe shëndetësia vijojnë të jenë shtylla kryesore e rritjes ekonomike me +1,65 pikë përqindje, ndërsa bujqësia shënoi rënie të theksuar prej 2,49%, duke dhënë një kontribut negativ në PBB.
Rënia e ritmit të ndërtimit ngre pikëpyetje mbi qëndrueshmërinë e rritjes ekonomike në të ardhmen, pasi ky sektor ka qenë një nga motorët kryesorë të zhvillimit në vitet e fundit, së bashku me tregtinë dhe shërbimet. /skyweb.ak
