Dhoma Amerikane e Tregtisë organizoi një trajnim informues për komunitetin e biznesit mbi ndryshimet më të fundit në sistemin e deklarimeve tatimore për vitin 2025. Aktiviteti u zhvillua në bashkëpunim me Drejtorinë e Përgjithshme të Tatimeve dhe mblodhi përfaqësues të shumtë të bizneseve dhe anëtarë të Dhomës.
Në fjalën e tij, drejtori ekzekutiv i Dhomës Amerikane të Tregtisë, Neritan Mullaj, theksoi se informimi i vazhdueshëm mbi ndryshimet ligjore dhe fiskale është thelbësor për bizneset. Sipas tij, mbajtja e kompanive të përditësuara mbi politikat fiskale mbetet një prioritet, duke pasur parasysh ndikimin që këto ndryshime kanë në aktivitetin e përditshëm të tyre.
Gjatë trajnimit, përfaqësues të administratës tatimore prezantuan rregullat e reja dhe mënyrën e plotësimit të deklaratave tatimore. Drejtoresha e Proceseve të Biznesit në Drejtorinë e Përgjithshme të Tatimeve, Rezana Celmeta, shpjegoi detajet teknike të ndryshimeve dhe iu përgjigj pyetjeve të bizneseve për zbatimin praktik të tyre.
Fokusi kryesor i aktivitetit ishte Deklarata Individuale Vjetore e të Ardhurave, një instrument i rëndësishëm për transparencën fiskale dhe administrimin e të ardhurave personale. Në këtë deklaratë përfshihen kategori të ndryshme të ardhurash, si pagat, të ardhurat nga qiratë, dividendët apo aktivitete të tjera ekonomike.
Përfaqësuesit e bizneseve ngritën gjatë takimit disa nga shqetësimet që hasen në procesin e deklarimit të të ardhurave dhe plotësimit të deklaratës vjetore, duke kërkuar më shumë qartësi mbi procedurat dhe kërkesat administrative.
Trajnimi u zhvillua në një format interaktiv, ku pjesëmarrësit patën mundësi të parashtrojnë pyetje konkrete dhe të diskutojnë drejtpërdrejt me ekspertët e administratës tatimore mbi sfidat që hasen gjatë procesit të deklarimeve fiskale. /skyweb.al
