Administrata Tatimore u ka bërë thirrje bizneseve dhe organizatave që kanë detyrimin ligjor për raportim financiar të dorëzojnë pasqyrat për vitin 2025 brenda datës 31 mars 2026.
Sipas njoftimit zyrtar, raportimi kryhet vetëm në mënyrë elektronike përmes sistemit e-Filing dhe është i detyrueshëm për subjektet që paguajnë Tatimin mbi Fitimin Korporativ ose Tatimin mbi të Ardhurat Personale nga Biznesi. Detyrimi vlen gjithashtu edhe për organizatat jofitimprurëse kur qarkullimi vjetor i tyre kalon mbi 5 milionë lekë.
Autoritetet tatimore sqarojnë se ky proces bazohet në legjislacionin në fuqi për tatimin mbi të ardhurat dhe për procedurat tatimore, si edhe në vendimin e qeverisë që përcakton deklarimin e dokumenteve tatimore vetëm në formë elektronike.
Pasqyrat financiare duhet të përgatiten në përputhje me ligjin për kontabilitetin dhe raportimin financiar. Ato dorëzohen në dy formate: në version PDF të skanuar dhe në version Excel.
Dokumentet në PDF duhet të jenë të firmosura dhe të vulosura nga administratori i shoqërisë ose nga personi përgjegjës për hartimin e tyre.
Së bashku me pasqyrat financiare duhet të dorëzohen edhe disa dokumente shtesë. Ndër to përfshihet gjendja e inventarit të mallrave, lëndës së parë, prodhimit në proces dhe produkteve të gatshme në datën 31 dhjetor 2025, si edhe inventari i mjeteve të transportit në pronësi të subjektit.
Administrata Tatimore thekson gjithashtu se subjektet duhet të plotësojnë edhe të dhënat përkatëse në seksionin “Kontabilitet” në llogarinë e tyre në sistemin e-Filing, duke përzgjedhur periudhën tatimore dhe duke plotësuar të gjitha fushat e kërkuara nga sistemi.
Në rastet kur pasqyrat financiare hartohen nga një punonjës i subjektit, duhet të deklarohet identifikimi personal i tij. Ndërsa kur ato përgatiten nga një kontabilist i licencuar, kompani auditimi apo shoqëri kontabiliteti, duhet të deklarohet numri unik i identifikimit të subjektit përkatës.
Administrata Tatimore u bën thirrje bizneseve që të respektojnë afatin ligjor për të shmangur penalitetet. Për çdo paqartësi, tatimpaguesit mund të drejtohen pranë drejtorive rajonale tatimore ose të kontaktojnë qendrën e thirrjeve në numrin pa pagesë 0800 0002. /skyweb.al
