Platforma e mediave sociale Snapchat, në pronësi të kompanisë amerikane të teknologjisë Snap, u përball të enjten me një hetim nga Bashkimi Europian, pasi rregullatorët paralajmëruan se duket se nuk po bën mjaftueshëm për të parandaluar joshjen e të miturve dhe shitjen e produkteve të paligjshme, raporton Reuters.
BE-ja po zhvillon hetimin në kuadër të Aktit të Shërbimeve Digjitale (Digital Services Act), i cili kërkon që platformat e mëdha online të bëjnë më shumë për të luftuar përmbajtjen e paligjshme dhe të dëmshme, përndryshe rrezikojnë gjoba deri në 6% të të ardhurave të tyre vjetore globale.
“Që nga joshja e të miturve dhe ekspozimi ndaj produkteve të paligjshme, deri te cilësimet e llogarive që cenojnë sigurinë e tyre, Snapchat duket se ka neglizhuar faktin që Akti i Shërbimeve Digjitale kërkon standarde të larta sigurie për të gjithë përdoruesit,” tha shefja e teknologjisë në BE, Henna Virkkunen, në një deklaratë.
Snapchat tha se rishikon vazhdimisht dhe forcon masat e sigurisë.
“Ne kemi bashkëpunuar plotësisht me Komisionin deri më tani, duke u angazhuar në mënyrë proaktive, transparente dhe me mirëbesim për të përmbushur standardet e larta të sigurisë të DSA-së dhe do të vazhdojmë ta bëjmë këtë gjatë gjithë këtij hetimi,” tha një zëdhënës.
Komisioni Europian, i ngarkuar me zbatimin e këtij akti, deklaroi se dyshon që Snapchat nuk ka masa të mjaftueshme mbrojtëse për të parandaluar që fëmijët të kontaktohen nga përdorues që synojnë t’i shfrytëzojnë seksualisht ose për aktivitete kriminale /skyweb.al
