Faqja satirike “Lol Albania”, e njohur më parë si “Lolita”, ka denoncuar një sulm ndaj llogarive të saj në rrjetet sociale, duke pretenduar se pas pezullimit të tyre qëndron imami Ahmed Kalaja.
Sipas administratorëve, faqet kryesore në Facebook dhe Instagram janë bllokuar pas një serie raportimesh të qëllimshme si edhe keqperdorimin e mbrojtjes së të drejtave të autorit, të lidhura me përmbajtje ironike të publikuar së fundmi.
Në reagimin e saj, “Lol Albania” pretendon se sulmi erdhi pas publikimeve ku përmendej dërgimi i hurmave në qelinë e Erion Veliaj, një fakt që vetë ky i fundit e kishte konfirmuar më herët në rrjetet sociale, si edhe deklarata të mëparshme të Kalasë për xhihad në Siri gjatë një takimi në Kosovë.
Faqja shton se justifikimi zyrtar për bllokimin lidhet me shkelje të të drejtave të autorit, por e konsideron këtë si një pretekst për të mbyllur zërat kritikë. Po ashtu, ajo pretendon se masa është ndërmarrë edhe pas publikimeve për një vizitë të Kalasë ndaj Veliajt në burg, si dhe për një rast gjyqësor ku ai është dënuar me gjobë nga Gjykata e Tiranës.
Në reagimin e saj publik, “Lol Albania” shprehet se është vënë në shënjestër përmes raportimeve të koordinuara dhe paralajmëron se do të vijojë aktivitetin e saj pavarësisht bllokimeve.
Ndërkohë, Asociacioni i Gazetarëve të Shqipërisë ka reaguar duke shprehur shqetësim për mbylljen e faqes dhe përpjekjet për të kufizuar praninë e saj në platforma të tjera.
Sipas AGSH, liria e shprehjes është një nga shtyllat themelore të një shoqërie demokratike dhe përfshin edhe satirën dhe ironinë si forma legjitime të kritikës publike.
Organizata thekson se përdorimi i raportimeve masive për të mbyllur faqe apo për të heshtur zëra kritikë përbën një formë presioni ndaj lirisë së shprehjes dhe krijon një precedent të rrezikshëm për censurë indirekte në hapësirën digjitale.
AGSH bën thirrje për respektimin e standardeve demokratike të debatit publik dhe paralajmëron se do të vijojë të monitorojë rastin dhe zhvillimet e tjera që mund të cenojnë pluralizmin dhe lirinë e shprehjes. /skyweb.al
