Kryeministri Edi Rama deklaroi se çmimet në turizëm nuk mund të kontrollohen nga qeveria, por përcaktohen nga tregu dhe strategjia e vetë bizneseve. Gjatë një takimi me operatorët turistikë në Vlorë, ai theksoi se zhvillimi i sektorit kërkon vizion afatgjatë dhe jo fitime të shpejta.
Rama u ndal te potenciali për të tërhequr turistë edhe jashtë sezonit veror, duke nënvizuar se vjeshta ka shënuar rritje dhe duhet shfrytëzuar më mirë. Sipas tij, investimet në hoteleri janë të mëdha dhe me kthim të ngadaltë, ndaj kërkojnë planifikim të kujdesshëm dhe analiza të përvojave të vendeve të tjera.
Ai paralajmëroi bizneset që të shmangin çmimet e larta dhe shërbimet e dobëta, duke theksuar se kjo qasje mund të dëmtojë rëndë imazhin e destinacionit. Sipas kryeministrit, vende të tjera turistike kanë bërë të njëjtin gabim, duke humbur më pas fluksin e vizitorëve dhe duke mbetur me investime të pashfrytëzuara.
“Nëse Vlora merr njollën e një vendi ku paguan më shumë se çfarë ofrohet, apo më shumë se në Greqi, Turqi apo Kroaci, atëherë bizneset i bëjnë vetes dëm”, u shpreh ai, duke e cilësuar këtë si një “gropë” për investimet.
Rama theksoi se synimi duhet të jetë një strategji afatmesme që garanton fitime të qëndrueshme dhe jo përfitime të menjëhershme që mund të kthehen në dëm në të ardhmen.
Në fund, ai u shpreh optimist për potencialin e Vlorës, duke e krahasuar me destinacione në Spanjë, Portugali dhe Turqi, dhe duke nënvizuar se Shqipëria ofron siguri, një element kyç për të tërhequr turistë dhe banorë të huaj në afat të gjatë.
