Qeveria e Turqisë do t’i dhurojë qeverisë shqiptare një avion VIP Airbus A319-115J, i konfiguruar për përdorim qeveritar, në kuadër të një marrëveshjeje bilaterale mes dy vendeve.
Siç mëson skyweb.al, marrëveshja është publikuar në Fletoren Zyrtare dhe parashikon kalimin e plotë të pronësisë pa asnjë detyrim financiar për palën shqiptare, ndërsa të gjitha kostot e transferimit do të mbulohen nga pala turke.
Avioni, me regjistrim TC-GVC dhe numër serial 1002, është prodhuar në shkurt të vitit 2000 dhe rezulton i certifikuar për operime ajrore. Dhurimi bëhet, sipas marrëveshjes, për të forcuar marrëdhëniet miqësore dhe bashkëpunimin strategjik mes Shqipërisë dhe Turqisë, të ndërtuara mbi Traktatin e Miqësisë dhe Bashkëpunimit të vitit 1992, si dhe për të thelluar bashkëpunimin institucional, teknik dhe në fushën e mbrojtjes.
Airbus A319-115J është variant VIP i familjes A320, i përdorur zakonisht nga qeveri, struktura ushtarake dhe flota diplomatike të vendeve anëtare të NATO-s. Avioni ka peshë maksimale taxi 75.9 tonë, peshë bosh rreth 44.8 tonë dhe fuqizohet nga dy motorë CFM56-5B7/P, me mijëra cikle operimi të mbetura.
Dhurimi i avionit vjen në një moment kritik për aviacionin shqiptar. Kompanisë Air Albania i është hequr licenca dhe ajo po shkon drejt falimentit, duke nxjerrë jashtë funksionit edhe flotën e saj. Një prej avionëve Airbus A319 të kësaj kompanie ishte përdorur ndër vite si charter për udhëtime zyrtare të Kryeministrit Edi Rama.
Në këtë kontekst, dhurimi nga Presidenti turk Recep Tayyip Erdoğan shihet si një lëvizje që garanton vijimësinë e transportit ajror qeveritar, duke bërë që Kryeministri Rama të mos mbetet pa charter personal pas mbylljes së Air Albania. Avioni pritet të integrohet në flotën qeveritare shqiptare dhe të përdoret për udhëtime zyrtare dhe misione diplomatike. /skyweb.al
