Zëvendëskryeministrja Belinda Balluku ka qenë sot në Novoselë, një nga zonat më të goditura nga përmbytjet e ditëve të fundit, ku ka ndjekur nga afër situatën dhe punën e strukturave të emergjencës.
Në deklaratën për mediat, Balluku bëri të ditur se Kryeministri, në bashkëpunim me Ministrinë e Financave, po përgatit një paketë të posaçme që do të sigurojë dëmshpërblimin e qytetarëve të prekur. Sipas saj, paketa do të përfshijë si dëmet në bujqësi, ashtu edhe ato në banesa.
Ajo paralajmëroi se 24 orët në vijim pritet të jenë problematike për shkak të kushteve të motit, me erëra të forta që në zonën e Ultësirës Perëndimore mund të arrijnë deri në 25 metra për sekondë. Për këtë arsye, Balluku theksoi rëndësinë e marrjes së masave parandaluese dhe bashkëpunimit të qytetarëve me autoritetet.
Sipas zëvendëskryeministres, prefekturat e Vlorës dhe Fierit, së bashku me bashkitë përkatëse, janë angazhuar për ngritjen e qendrave të akomodimit dhe evakuimit. Ajo pranoi se shumë banorë hezitojnë të largohen nga shtëpitë e tyre, por nënvizoi se në këto momente prioritet mbetet mbrojtja e jetës.
Balluku njoftoi gjithashtu se mëngjesin e së premtes do të mblidhet Komiteti i Emergjencave Ndërqeveritare, ku në fokus do të jetë situata e përmbytjeve në vend. Në këtë mbledhje pritet një adresim i posaçëm nga Kryeministri, jo vetëm për menaxhimin e situatës aktuale, por edhe për mekanizmat e dëmshpërblimit.
Sipas saj, ndërhyrja e shpejtë dhe marrja e masave përpara përkeqësimit të situatës janë thelbësore për të shmangur pasoja edhe më të rënda për qytetarët dhe zonat e prekura.
