Meta pritet të nisë testimin e abonimeve premium për përdoruesit e Instagramit, Facebook-ut dhe WhatsApp-it në muajt e ardhshëm, në kuadër të përpjekjeve të saj për të zgjeruar shërbimet me pagesë. Paketat e reja do të ofrojnë akses në veçori të avancuara, përfshirë mjete të zhvilluara të inteligjencës artificiale (AI), ndërsa përdorimi i shërbimeve bazë do të vijojë të mbetet falas.
Paralelisht, kompania planifikon të eksperimentojë edhe me abonime të veçanta për funksione specifike, si aplikacioni i gjenerimit të videove Vibes. Sipas Meta-s, Vibes u mundëson përdoruesve të shndërrojnë idetë e tyre në përmbajtje vizuale përmes mjeteve të reja krijuese të bazuara në AI. Ky aplikacion u prezantua në shtator, si pjesë e versionit më të fundit të Meta AI.
Sipas TechCrunch, i cili e raportoi i pari lajmin, Meta synon gjithashtu të integrojë në këto plane kompaninë Manus, një startup i inteligjencës artificiale i themeluar në Kinë, të cilin Meta ra dakord ta blejë në dhjetor për rreth 2 miliardë dollarë.
