Ministri i Infrastrukturës dhe Energjisë, Enea Karakaçi, ka sqaruar në Kuvend arsyet e tërheqjes së kompanisë së vetme që kishte mbetur në garë për projektin e Porto Romanos.
Gjatë një interpelance, ai theksoi se projekti ka standarde të larta dhe kompleksitet teknik, çka e bën procesin e tenderimit më të vështirë.
Sipas ministrit, për projektin janë zhvilluar dy procedura konkurruese, ku në fazën e fundit kanë marrë pjesë pesë subjekte.
Një prej tyre ka arritur të përmbushë kriteret dhe është shpallur ofertues i suksesshëm, por më pas është tërhequr nga gara.
Karakaçi sqaroi se tërheqja është bërë për shkak të rritjes së kostove të projektit, duke bërë që fondi i parashikuar të mos i mbulojë më shpenzimet reale.
Ai theksoi se kompania ka ushtruar të drejtën e saj për t’u tërhequr, duke njoftuar zyrtarisht arsyet që lidhen me ndryshimet në kosto.
Ministri nënvizoi se procedura është zhvilluar në përputhje me ligjin për prokurimet publike dhe se vështirësitë e hasura lidhen me natyrën e një projekti të përmasave të mëdha dhe me kërkesa të larta teknike.
Gjatë fjalës së tij, Karakaçi foli edhe për rëndësinë strategjike të portit të ri të Porto Romanos, duke theksuar se ai synon të kthehet në një nyje të rëndësishme rajonale për transportin dhe ekonominë.
Ai shtoi gjithashtu se projekti nuk ndikohet nga zhvillimet në Marinën e Durrësit. /skyweb.al
